IV
Marisci ‘nsiddhrisciati te palore
titte ‘ntise a nnui
t’ogni ppansieri
‘mmiratu intr’u teatru a ccantinelle
zate ricurdate
te chianti e dde ‘llecria vasate
V
comu tanti ggirasoli
ca se ‘mmùtene a llu sule
VI
E ppoi li russi ‘nterra
intr’a lla terra russa
‘ssutta ll’àrbuli t’ulìe
crutte te sparanza
‘rrustuti te sciarocchi e bbrofumati
te l’argentu te la luna
VII
Comu méndule culumbi e ccalarise
e ppire e bbruni e ssite
e nnui fuscendu
cantandu intr’a carrara
VIII
‘u coppu comu conca t’acqua chiara
pe cci’ se ‘mmira o ci’
se mmoddhra ‘i musi
pe’ ‘n’addhru jàggiu
IX
Puru ‘i cardilli sguàriene cu nnui
e nnui ne canuscimu comu iddhri
bballandu ‘mmenzu ‘ll’ària intr’i culori
t’gni rricordu rripa ripa ‘mmare
X
l’acqua te cisa’ quale pardunu
se manìscia cu ttuppa su’ lli scoji
e ppoi cu ttorna ‘rretu a bbane e bbeni
comu palore comu cose e ssoni
XI
E unu comu l’addhru
comu scemme o fiuri
quandu ‘u jentu ondulìscia li culori
e scasa ‘nciarfisciandu maravije
te muttura
XII
A ddhrai bbabbate luci janche janche
te luna nova catuta ‘mmenzu ‘nnui
XIII
‘A luna jeu tie l’addhri e lle cose
la terra e llu mare
XIV
E rripìja lu jàggiu n’addhra fiata
caracati t’ogni ‘ncantu intr’i misteri
te tanta Luce nui
nu nne fitamu
mancu ‘rrifiatamu
àngili cchiu’ ddhrai te crai te jeri
pittati su’ ppresepi te murteddhra
pe’ ‘nn’addhra luna a nnui sempre cchiu’
bbeddhra
XV
Mmasura mmasura le stelle
ccumenza ccumenza cu ppitti
raccoji le cose cchiu’ bbelle
te petre t’i canti
t’i rucchi
t’u mare t’i fiuri t’u core
‘nturtìja pansieri e ssanducchi
mmanéscia ‘na storia t’amore.
(28.07.2002 h.7,53)
