di Cino da Portaluce (Fedele Salacino)
(A A. P.)
Hannu li labbri toi tutta la tinta
de lu curaddhu quando spicca a mare;
e li dentuzzi, poi, le vampe chiare
comu de perla lùcida, distinta;
de rose vellutate, a maggiu, pare
la faccia toa de n’àngelu ripinta;
d’oru la trezza morbida, mai vinta,
a cànnuli piecata, a nocce rare.
Ma l’occhiu, soprattutto, rubbacore
è sulitariu sìmile lla stella
ci mai lu vitte Rre né Mperatore.
Tene Crisu la petra minutella,
l’oru, l’argentu, l’elisir d’amore
ma manca de na cosa e la cchiù beddha:
la facce verginella
manca, la facce toa, manca lu vezzu,
sommu trisoru ci nunn’àve prezzu!
[A tiempu persu, Marra e Lanzi, Galatina 1927, con una lettera di Tommaso Fiore]
